O Concello de Bergondo comezou esta semana unha intervención integral na zona da Travesía de San Cidre que conta cun investimento total de 298.729,05 euros. Esta actuación, enmarcada no POS+adicional 2/2024 da Deputación da Coruña e cofinanciada entre a entidade provincial e o Concello, ten como obxectivo prioritario garantir a seguridade da veciñanza e transformar a contorna do Mosteiro de San Salvador e o cemiterio parroquial en espazos máis accesibles e funcionais.
Os traballos principais consisten no acondicionamento das marxes de dúas estradas municipais e das inmediacións do emblemático Mosteiro de San Salvador. O proxecto contempla a creación de espazos transitables sobre as novas cunetas de seguridade proxectadas, permitindo que os peóns dispoñan dunha zona protexida e cómoda para os seus desprazamentos habituais.
De forma paralela, o goberno local aproveitará a intervención para modernizar as infraestruturas subterráneas coa instalación dunha nova rede de pluviais que optimizará a evacuación de auga na zona.
Aparcadoiro e calmado de tráfico na contorna do cemiterio
A actuación esténdese tamén á intersección de dous viais na contorna do cemiterio, un punto que rexistra unha notable afluencia de persoas e vehículos. Neste enclave, o Concello procederá á urbanización completa do espazo para facelo plenamente accesible e á reorganización do aparcadoiro existente para mellorar a comodidade dos usuarios. Ademais, instalarase un pavimento de lastra prefabricada sobreelevado que obrigará a reducir a velocidade dos vehículos.
Dende o goberno local de Bergondo destacan que este proxecto “representa unha aposta decidida pola humanización das parroquias e a protección da veciñanza que transita a diario pola zona”. Sinalaron que, grazas ao financiamento do POS+adicional 2/2024, é posible executar unha obra ambiciosa que non só soluciona problemas técnicos de drenaxe, senón que transforma a seguridade viaria en puntos neurálxicos como o Mosteiro de San Salvador e o cemiterio
Así mesmo, subliñan que “a nosa prioridade é seguir dotando ao rural de infraestruturas modernas que calmen o tráfico para garantir esa seguridade peonil”
