‘Bancos para a xustiza social’ é un proxecto de sensibilización cidadá para a xustiza social, realizado polo Concello de Bergondo ao amparo dos fondos do Pacto de Estado. Tras unha proba piloto na que se creou de maneira colaborativa un banco pola igualdade, o obxectivo é intervir sobre oito pezas máis do mobiliario urbano en colaboración coa artista local Iria Fafián. Os temas escollidos son diversidade cultural, diversidade funcional, mocidade, infancia, defensa do medio ambiente, diversidade sexual, persoas maiores e saúde mental.

O deseño dos bancos é colaborativo, partindo de talleres abertos nos que a cidadanía dá ideas para a mensaxe, imaxe ou emprazamento destes elementos. Os talleres están conducidos por educadoras da cooperativa Rexenerando, e contan ademais coa colaboración de entidades que traballan de maneira específica cos colectivos interpelados.

O proxecto finalizará coa presentación dos bancos creados nun acto que se celebrará no mes decembro do 2023 e no que tamén participarán os colectivos implicados no seu deseño.

A igualdade ocupa rúa

 

O Concello de Bergondo inaugurou no mes de maio de 2023 o seu banco pola igualdade, creado a través do obradoiro colaborativo ‘A igualdade ocupa rúa’, que supón a cuarta fase do programa ‘Bergondo en feminino’, impulsado pola concellería de Benestar Social.

Culminou así un proceso no que as mulleres participantes no taller se reuniron para sumar ideas e empezar a plasmar o deseño do banco. Todas estas persoas foron as encargadas de dar a coñecer o banco, instalado en San Cidre, á beira do edificio de Servizos Sociais e da casa do concello. Nas súas táboas pode lerse o lema ‘Queremos e podemos’ xunto á ilustración deseñada no obradoiro.