A vixésimo cuarta edición do Festival Guísamo Folk, organizado polo Concello de Bergondo, celébrase este sábado, 23 de agosto, no centenario Campo da Feira de Guísamo, e o cartel é unha clara demostración de intencións: apostar polos novos formatos da música tradicional galega.
E é que para esta ocasión o Guísamo Folk, unha cita musical xa arraigada na programación cultural da provincia e de Galicia, contará coas actuacións de Baiuca, Mondra, Abril e De Vacas. Os concertos comezarán ás 20 horas e antes, desde as 16 horas, levarán a cabo diferentes talleres e actividades.
O Campo da Feira foi o lugar escollido para realizar a presentación da vixésimo segunda edición do Festival Guísamo Folk, na que participaron a alcaldesa de Bergondo, Alejandra Pérez Máquez, a concelleira de Cultura, Patricia Vázquez, e a técnica encargada do Festival, Leticia Rey.
Alejandra Pérez Máquez incidiu en que “é unha aposta decidida polos novos formatos da nosa música tradicional que están a triunfar nos últimos tempos”. “Cremos que se conformou un moi bo cartel, con propostas para todos os públicos, e que a xente os vai desfrutar”, afirmou.
A alcaldesa explicou que “o Guísamo Folk sempre foi unha festa familiar e iso mantense. A tradición é vir a comer, estar pola tarde, e desfrutar dos concertos”.
Patricia Vázquez destacou que este ano o cartel é obra do ilustrador bergondés Adrián Prado e lembrou que “contamos cun amplo espazo para aparcamento preto do Campo da Feira” e agradeceu “aos veciños e veciñas que sempre colaboran, agardemos que ou tempo acompañe e que desfrutemos, neste espazo idílico, dunha gran xornada de festa en familia”.
A música asolagará o Campo da Feira
Como é habitual, a xornada do sábado 23 de agosto comezará coa comida campestre que todos os anos realizan os veciños nesta data. Seguirá cos talleres e xogos tradicionais durante a tarde e, unha vez empece a música, a festa non parará ata alcanzar a medianoite.
A primeira formación en subir ao escenario será Abril. O trío, formado por Claudia Abril (voz e percusión), Mariña Carpente (violín e voz) e Antón Lago (guitarra e voz), é un proxecto que mestura músicas de raíz galega e ibérica con outros xéneros.
O seguinte concerto será o de De Vacas, un grupo formado polas santiaguesas Inés Salvado, Faia Díaz e Paula Romero e o nigranés Guillerme Fernández. Co seu espectáculo ‘Rebovina Divas Ao vivo’ fan unha homenaxe ás divas do pop: Whitney, Celine, Mónica, Beyonce… Ás músicas e bases electrónicas súmanse espectaculares coreografías.
Martín Mondragon, ‘Mondra’, continuará coa festa. Natural de Teo, está considerado como unha das novas estrelas do trad, un xénero en auxe que bebe da música tradicional galega e convértea nun son plenamente actual.
Baiuca pechará o festival. O artista Alejandro Guillán está a triunfar por todo o país co seu proxecto no que tenta achegar a tradición galega á vangarda e á electrónica. Instrumentos tradicionais asócianse con sintetizadores, caixas de ritmo e programacións.
2025Talleres, xogos e comida campestre
O Festival Guísamo Folk é máis que música. A festa iníciase todos os anos á hora para comer cando o Campo dá Feira situado en Pedras Brancas acolle aos bergondeses que se reúnen para realizar unha tradicional comida campestre. As mesas de pedra poderán reservarse desde o venres 22 ás 17 horas no propio campo. Ademais, o Concello poñerá a maiores máis mesas portátiles.
Pola tarde haberá xogos tradicionais e tres obradoiros, de xabóns artesanais, de elaboración de zume de mazá e de lixo mariño. Estas actividades estarán dispoñibles desde as 16:00 horas. No Campo dá Feira tamén terán os seus postos de comida e bebida as entidades do municipio; Comisión de Festas de Guísamo, Comisión de Festas de Ouces e Comisión de Festas de Vixoi; e as empresas Mico-Midas Food Truck e Bico de Xeado.
Ao longo do día o festival estará amenizado pola Agrupación de Musica Tradicional de Bergondo.
