O Concello de Bergondo publicou a programación da súa ‘Outono Cultural’ para este ano 2025 na que hai monólogos, teatro, música, maxia, marionetas ou circo e que se realiza coa colaboración da área de Cultura da Deputación da Coruña. A axenda desenvolverase integramente na Senra e o acceso a todos os espectáculos é gratuíto, ata completar aforo.
A primeira función terá lugar o vindeiro sábado, 20 de setembro, ás 19 horas. Leti da Taberna traerá a Bergondo o seu monólogo ‘Enredada’, no que explora, nun ton irónico, a nosa relación coas redes sociais e como nos inflúen no día a día.
A programación continuará durante todos os sábados, ata o 29 de novembro, que finalizará co espectáculo circense ‘Assircópatas’, de Rogelio A Fête. Antes, o público bergondés poderá gozar da obra de teatro ‘Castelao’, o espectáculo teatral e musical ‘Cantaxoga’, a obra ‘As Formas do Amor’, a maxia do Mago Teto, e a actuación de marionetas de Galittón. A programación completa pode consultarse na páxina web municipal www.bergondo.gal.
Carné teatreiro
Asistir ao ‘Outono Cultural’ ten premio. Este ano volveuse a habilitar o coñecido como ‘Carné Teatreiro’, un carné para as actuacións teatrais ou musicais que organice o Concello. En determinadas funcións colocarase un selo na tarxeta e, unha vez xúntense catro, entregarase un bono por importe de 15 euros para realizar compras nos establecementos adheridos á campaña de promoción do comercio local ‘En Bergondo, mellor’.
