O Concello de Bergondo acolleu este xoves, 6 de agosto, coincidindo coa festividade de San Salvador, a presentación oficial do libro «Memoria en pedra», unha obra que afonda na historia e no rico patrimonio que alberga o Mosteiro de San Salvador.
O acto, celebrado ás 11:00 horas no propio convento nunha data tan simbólica para a parroquia, contou coa presenza dos seus autores, o párroco Rubén Aramburu e Xosé M. Salgado, así como de representantes do goberno local.
A publicación sae á luz como un dos fitos centrais da programación conmemorativa impulsada polo Concello para celebrar o 900 aniversario do Mosteiro de San Salvador. A obra propón un percorrido rigoroso e accesible pola evolución histórica do cenobio e pon en valor a arquitectura, a arte e a relevancia cultural dun dos monumentos máis emblemáticos do municipio e da comarca.
Durante a presentación, a alcaldesa de Bergondo, Alejandra Pérez Máquez, sinalou que «é un orgullo para Bergondo poder celebrar os 900 anos do Mosteiro de San Salvador cunha obra tan rigorosa e necesaria como esta. O noso patrimonio non é só pedra, senón tamén a memoria viva da nosa veciñanza. Desde o Concello seguiremos apostando decididamente por protexer, divulgar e achegar a nosa riqueza histórica a todas as xeracións, e quero agradecer profundamente o traballo e a dedicación dos autores por agasallarnos con esta peza clave para comprender a nosa identidade».
Xosé M. Salgado destacou durante a súa intervención que «o libro recolle o que sabemos do Mosteiro, hai que ter en conta que o seu arquivo ardeu na Idade Media polo que, ante a carencia documental coa que nos atopamos, o noso obxectivo foi recoller a información de distintas fontes e xuntala nun relato que fose de fácil lectura».
Pola súa parte, o párroco e coautor do libro, Rubén Aramburu, fixo un repaso pola historia do mosteiro e salientou que «debe seguir ofrecendo neste momento, como fixo en tempos pasados, ese espazo de silencio e de escoita» e desexou que «a mil anos máis, aínda que nós non o vexamos».
Ademais, houbo espazo para unha pequena sorpresa que tiña preparada Rubén Aramburu para Antonia Fernández Barbeito, unha veciña que ten como afección escribir poemas. Repartíronse entre as persoas asistentes copias impresas de un dos seus relatos que trata sobre o mosteiro e que ademais recitou en alto a súa filla, Katy López Fernández.
A edición e difusión de «Memoria en pedra» súmase ao conxunto de actividades culturais, institucionais e de divulgación que o Concello de Bergondo está a desenvolver ao longo deste ano para achegar a riqueza patrimonial de San Salvador tanto aos veciños e veciñas como ás persoas visitantes.
