O Concello de Bergondo acaba de publicar no perfil do contratante a licitación do proxecto de humanización e mellora da seguridade viaria e da accesibilidade na vía da praia de Gandarío, unha obra que conta cun orzamento de 514.998,87 euros e que está cofinanciada a través do Plan Único da Deputación da Coruña e fondos municipais.

A actuación permitirá substituír o itinerario peonil de madeira, que actualmente conta con 1,90 metros de ancho e que ten uns altos custos de conservación, por un paseo de baldosa hidráulica de 3,50 metros de ancho. A beirarrúa conta cun bordo remontable de granito para facilitar o acceso. A calzada, que tamén se pavimentará, será de 3 m de ancho e de dirección única cara ao leste, de 5,80 m cara ao oeste e dobre dirección ata a entrada do cámping.

Ademais, protexerase do tráfico ás persoas usuarias das mesas do piñeiral cunha banda de céspede de 1 metro de ancho.Tamén se ordenarán os extremos do paseo, pavimentando os sobreanchos con lastro de granito, e xeraranse novas prazas de aparcamento para persoas de mobilidade reducida, situadas en lugares axeitados para o uso e goce da praia.

Por outro lado, ocultaranse os colectores de residuos, renovarase a caseta de socorrismo e os baños, duchas, lavapés, paneis informativos e o restante mobiliario urbano.