O Concello de Bergondo logrou un fito histórico para o municipio ao formalizar a compra da antiga casa reitoral de Guísamo e do seu iglesario. Tras un longo proceso de xestións que comezou no ano 2018 —momento no que o goberno local plantexou á Igrexa dúas opcións: unha cesión de uso por 70 anos ou a adquisición directa—, finalmente alcanzouse un acordo definitivo de compravenda co Arcebispado de Santiago de Compostela por un importe de 80.000 euros.
O principal obxectivo do goberno local con esta adquisición, formalizada o pasado xoves, 18 de xuño, ante notario por parte da alcaldesa, Alejandra Pérez Máquez, é transformar a reitoral, actualmente nun estado de deterioración, nun gran centro social interxeracional.
Desde o executivo local explican que o propósito é que este novo espazo ofreza actividades que favorezan a conciliación das familias, integrando tanto ás persoas maiores como aos máis pequenos do municipio. “Cremos que a reitoral é o lugar idóneo para facelo xa que conta co espazo necesario para este tipo de infraestruturas”, destacan desde o goberno local.
Aínda que os usos definitivos se concretarán máis adiante, a idea inicial do Concello é que poida albergar o desenvolvemento de programas de tipo social. Ademais, outro dos obxectivos é que este espazo sirva como homenaxe a todo o traballo levado a cabo polo cura de Guísamo, José García Verdía.
Condicións de uso e garantía pública
O inmoble adquirido conta cunha extensa parcela de 2.549 metros cadrados. Nela aséntase a edificación principal, que dispón dunha superficie construída de 322 metros cadrados, divididos en dúas plantas de 161 metros cadrados cada unha.
Para asegurar o interese xeral desta operación, a escritura de compravenda inclúe unha condición resolutoria especial que quedará inscrita no Rexistro da Propiedade. Esta cláusula estipula que o Concello de Bergondo destinará obrigatoriamente o inmoble á creación deste centro interxeracional ou, en caso de non ser posible, a calquera outro servizo público municipal que redunde en beneficio dos veciños e veciñas.
Busca de financiamento para a rehabilitación
Tras facer efectiva a compra e asegurar a titularidade pública do espazo, o seguinte paso do Concello será afrontar a reforma integral do edificio debido ao seu mal estado de conservación. O goberno local encargará para iso unha valoración técnica para redactar o proxecto técnico.
Para poder acometer esta ambiciosa actuación, o equipo de goberno comezará agora a busca activa de financiamento, combinando a achega de fondos municipais coa solicitude de axudas a outras administracións, como a Deputación da Coruña, garantindo así que un espazo emblemático de Guísamo pase a ofrecer servizos clave para o benestar de toda a veciñanza.
