O Concello de Bergondo someterá a aprobación no pleno ordinario deste xoves, 30 de xullo, un suplemento de crédito no que se inclúe unha subvención nominativa á Igrexa de 55.000 euros. Esta achega municipal ten como obxectivo financiar de forma conxunta o proxecto para levar a cabo unha actuación urxente de drenaxe e recheo para solucionar os afundimentos dos panteóns no cemiterio de Cortiñán.
Este acordo chega tras analizar o informe encargado polo Concello para coñecer a situación real do subsolo do camposanto e chegar á conclusión de que é a alternativa máis viable para intervir nunha propiedade que non é municipal. A pesar de que o cemiterio non é de titularidade do Concello, o camiño municipal rodea o recinto e a igrexa. Ao tratarse do único camposanto da parroquia de Cortiñán, e tras descartarse a construción dun novo polos longos prazos que esixiría, o goberno local decidiu colaborar economicamente coas obras de arranxo por razóns de interese público.
Os problemas no recinto remóntanse a maio de 2024, cando se tivo constancia de danos estruturais e colapsos nas cubertas dos nichos da última ampliación. Máis recentemente, observouse a formación de fochancas no terreo colindante e o colapso do terreo nun dos corredores. O informe técnico externo contratado polo Concello determinou que a causa principal destes afundimentos é un fluxo de auga subterránea procedente dunha finca lindante situada a unha cota superior, sumado a filtracións no sistema de recollida de pluviais.
Para atallar definitivamente o problema, cuxo custo estimado pola Igrexa ascende a 110.000 euros, o proxecto contemplará:
A supresión do fluxo de auga subterránea: reparando ou suprimindo a tubaxe que conduce a auga á fonte do cemiterio, creando unha franxa de drenaxe profundo na liña de peche exterior e instalando liñas de drenaxe superficial para evitar a acumulación de auga nas laxas de cimentación dos panteóns.
A estabilización do terreo esponxado: inxectando columnas de morteiro baixo as cimentacións dos nichos para garantir a súa estabilidade e substituíndo o recheo de terras nas zonas de maior afección por un material que garanta a capacidade portante.
Tras as reunións mantidas entre o goberno local e os representantes da Igrexa, a institución relixiosa encargarase da redacción inmediata do proxecto construtivo. Pola súa banda, o Concello de Bergondo materializará a súa axuda a través desta subvención.
Desde o goberno local sinalan que “a día de hoxe, e despois de concretar a compra da reitoral de Guísamo e esta solución para o cemiterio de Cortiñán, temos outras vías de colaboración abertas coa Igrexa, co obxectivo de transformar terreos que son da súa propiedade en contornas útiles para a cidadanía”. “Un exemplo destas novas liñas de traballo é o adecentamento do adro da igrexa de Santa Marta”, destacan.
