Molto Barroco é, antes que nada, unha reivindicación das composicións barrocas dende o teatro. Píscore Teatro ofrece a posibilidade de gozar, dende o teatro e o humor, da música da época barroca.

Co motivo do baile de petición da man á súa prometida, o Rei encarga ao compositor da corte unha peza orixinal. Esta solicitude desencadea nunha serie de escenas cómicas entre o compositor e os seus tres músicos de cámara, nas que teñen cabida todo tipo de gags, rutinas cómicas e musicais, bailes e ata xogos malabares.