Acto de renomeamento do centro social de Cortiñán como ‘Josefa Crespo Veiga’

O Concello de Bergondo programa para o vindeiro mércores, 29 de novembro, ás 17:30 horas o acto oficial de nomeamento do centro social de Cortiñán como Josefa Crespo Veiga, ‘Fina a costureira’. Unha iniciativa xa aprobada polo pleno da corporación e que dá continuidade ao proxecto ‘Bergondo en feminino’, impulsado pola concellería de Servizos Sociais.

Josefa Crespo, ‘Fina a costureira’, pasa así a formar parte do proxecto ‘Bergondo en feminino’, por ser unha das veciñas de Cortiñán máis lembradas, así como por desenvolver un oficio tradicionalmente vinculado coas mulleres e que contou con pouca visibilidade na sociedade. Aos 28 anos monta un taller e comeza a ensinar costura gratuíta a mozas do lugar. Centos de mulleres pasan por alí ao longo de máis de 30 anos de leccións. ‘Bergondo en feminino’ visibiliza a súa historia por haber desenvolvido e ensinado un oficio valioso e tradicionalmente feminizado, e pola súa capacidade para xerar comunidade e alegría ao seu redor.

A tarde do mércores 29 de novembro en Cortiñán será, a partir das 17:30 horas, unha xornada de portas abertas, festa, recordos e recoñecementos en honra de Josefa Crespo Veiga. Haberá unha actuación musical de Pedro Lamas e do alumnado da Escola de Música Tradicional APA As Mariñas do CPI Cruz do Sar e unha degustación de produtos da Reserva da Biosfera a cargo de Artesa da Moza Crecha, de Betanzos.

O proceso de investigación iniciado dentro do programa ‘Bergondo en feminino’, que comezou a súa andaina no ano 2019, xa permitiu bautizar nove instalacións municipais co nome de mulleres bergondesas relevantes:

  • Centro Social de Cortiñán Josefa Crespo Veiga ‘Fina a costureira’.
  • Centro Social de Fiobre, Filomena Dato Muruais.
  • Centro Social de Guísamo, Ma de los Dolores Miramontes Matos.
  • Casa da Mocidade Jacinta Landa Vaz.
  • Centro Social de Lubre, María Fernández Sánchez “Maruxa do Chelo”.
  • Salón de actos da Casa da Cultura, Mercedes Núñez Targa.
  • Centro Social de Vixoi, Luísa Viqueira Landa.
  • Centro Social de Santa Marta de Babío, Xabiela Fraga Sánchez.
  • Centro Social de Ouces, Antonia Pato Pardo.

“Bergondo en feminino” é unha liña de traballo do Concello de Bergondo que arrincou no 2019 cun taller de investigación participativa e o deseño dun roteiro e folleto. Naquela edición foran rescatados os nomes de nove veciñas históricas, relevantes para a memoria das mulleres e deste territorio. No 2021 e o 2022 proseguiu a actividade, incorporando cinco novas figuras, e realizando videoguías e un mapa interactivo que poden ser consultados en https://bergondo.gal/descobre-bergondo/bergondo-en-feminino/.