O Concello de Bergondo, nunha clara aposta pola conciliación e as actividades de lecer, acaba de publicar a listaxe de actividades e campamentos de cara ao verán de 2026, nos que hai dispoñibles ata 1.145 prazas. Esta cifra supón un aumento con respecto ao ano 2025, cando se ofertaron 1.120 prazas.

A oferta vai dirixida a nenos e nenas desde os 3 anos e hai opcións incluso para maiores de 55 anos, así como actividades puntuais para toda a familia. Repetiranse nesta edición os campamentos deportivos para o alumnado de secundaria.

O prazo de preinscrición ábrese este próximo luns, 18 de maio, e permanecerá aberto ata o xoves 21 de maio. As persoas interesadas teñen dúas formas de apuntarse: a través dun formulario web (https://docs.google.com/forms/d/1on8O3xwg4zXiYkfTdPEFxvNsW7-dg2Go429qYSSZKZc/closedform), ou presencialmente na Casa da Cultura de 9:30 a 14:30 horas.

Campamentos de conciliación

Desenvolveranse na Senra e están dirixidos aos nenos e nenas de 3 a 12 anos. O horario será de 9:00 a 14:00 horas, coa posibilidade de gozar dun servizo ampliado de 8:00 a 15:00 horas. Os participantes que entren ás 8:00 terán dereito a almorzo sempre e cando o especifiquen na súa solicitude.

Campamentos deportivos para secundaria

Haberá dous campamentos: un do 1 ao 15 de xullo e outro do 16 ao 31 do mesmo mes. Desenvolveranse no edificio da Senra e a súa contorna e ofértanse ata 24 prazas como máximo -necesitándose un grupo mínimo de oito-.

Outros campamentos e actividades

Ademais destes campamentos de conciliación, o Concello de Bergondo poñerá en marcha outras actividades durante o período estival. Unha delas é o Campamento de Verán 2026, pensado para a poboación de 8 a 16 anos, no Galipark Multiaventura de Padrón. Outra actividade programada é a visita ao Aquapark deCerceda, prevista para o 22 de xullo. Ofrécense 44 prazas para mozos e mozas de 5 a 17 anos. Outra actividade é o Día en familia no Aventura Dakar en Sanxenxo, previsto para o 11 de xullo. Para pasar unha xornada diferente en familia, ofértanse 58 prazas.

Actividades deportivas

Contémplanse dúas quendas de actividades náuticas. Todos os martes e xoves de xullo e agosto de 10:00 a 13:00 horas na praia de Gandarío realizaranse diferentes actividades no mar. Ofértanse ata un máximo de 30 prazas por quenda.

Por último, tamén hai ofertas para as persoas adultas, con actividades deportivas durante os meses de xullo e setembro. Haberá obradoiros de ioga, taichí, pilates e zumba no ximnasio ou na pista polideportiva da Casa da Cultura. Para maiores de 55 anos levarase a cabo unha actividade de prevención de danos músculo-esqueléticos.

Campus organizados por entidades deportivas

A toda esta oferta que programa o Concello de Bergondo para os meses de verán hai que sumar os campus deportivos que organizan as entidades do municipio. Así, o Club Atlético Bergondo, o Club Rítmica AUSARTA e o Club de Remo Olímpico do Mandeo programan as súas propias actividades para nenos e adolescentes durante o período estival.

Datos importantes

Solicitude de praza: do 18 ao 21 de maio
Listas provisionais: 26 de maio