Un ano máis, o Concello de Bergondo convida á súa veciñanza a participar no Concurso de Postais de Nadal, que celebra xa a súa décimo segunda edición.
Esta iniciativa, creada para fomentar a creatividade e o espírito do Nadal entre os veciños e veciñas, está dirixida a todas as persoas empadroadas en Bergondo ou que estudan nalgún dos centros educativos do municipio, como o CRA de Bergondo, o CPI Cruz do Sar, o CPAP de Bergondo ou o CFEA de Guísamo.
O concurso abrangue un amplo rango de idades, con catro categorías diferenciadas:
Unha para Educación Infantil,
Outra para os primeiros cursos de Primaria (de 1º a 3º),
Unha máis para os cursos superiores de Primaria (de 4º a 6º),
E, por último, unha categoría aberta para estudantes de Secundaria, Bacharelato e persoas adultas.
As postais, que poderán realizarse con técnica libre, deberán presentarse en formato A5 (15 x 21 cm), en orientación vertical ou horizontal, e empregando as cores que o participante desexe. Para facilitar a súa manipulación e avaliación, o Concello recomenda que as postais se entreguen sen dobrar. Na parte posterior de cada creación deberán incluírse os datos identificativos: nome, apelidos e categoría do participante. No caso de menores, será necesario engadir tamén o nome, apelidos e teléfono da persoa representante legal.
As persoas interesadas terán ata o 10 de decembro para presentar as súas propostas, podendo optar a un bono de 80 euros en cada categoría como recoñecemento á calidade e orixinalidade das postais gañadoras.
As bases completas do concurso poden consultarse na sede electrónica do Concello ou dirixíndose ao Departamento de Cultura e Deportes a través do correo electrónico 📧 cultura.deportes@bergondo.gal ou do teléfono ☎️ 981 791 252 (ext. 7).
