O Concello de Bergondo elixiu como as opcións máis viables dentro do proceso de orzamentos participativos para 2024 o acondicionamento e adecuación dunha senda peonil na entrada principal do polígono en Santa Marta e a execución de beirarrúas na AC-164 ao seu paso por San Cidre.
Por unha banda, acondicionarase e adecuará unha senda peonil, xunto coa mellora da iluminación na zona, desde a entrada do Polígono en Santa Marta ata o cruzamento de Ferrol. Esta proposta, presentada pola Asociación de Empresarios de Bergondo, foi seleccionada como a mellor de entre as 36 opcións presentadas.
Polo outro, tamén se incorporará entre as partidas do orzamento municipal para 2024 una das seguintes 10 mellores ideas. Neste caso será a presentada por Carolina Vaz González para a execución de beirarrúas na marxe esquerda da estrada AC-164 nun tramo de 275 metros despois da rotonda dos Condes, en dirección Ferrol.
As mellores propostas levan premio, en forma de bonos para gastar no comercio local. Así, a Asociación de Empresarios de Bergondo, que presentou a proposta elixida como gañadora deste proceso leva un vale de 100 euros e as seguintes 10 mellores un de 30 euros cada unha. Estas últimas son:
- Creación de beirarrúas en Bergondo (AC-164), de Carolina Vaz González.
- Acondicionamento dos camiños do Souto e Suavila en Vixoi, de Juan Carlos Lamas Carro en representación da Asociación de Veciños de Vixoi. O camiño do Souto xa está previsto nun plan de asfaltados e o de Suavila reacondicionarase.
- Mellora da pista deportiva do parque de Vixoi, de Carolina Otero Rodríguez. Faranse melloras.
- O Xardín das Orquídeas, de Maricel Miramontes Vidal. Executarase un valado específico, tentando preservar as orquídeas.
- O Museo de Lubre, de Iván Matos Recouso. Estudarase a súa implantación a futuro.
- A recuperación do lugar de As Salinas do Pedrido, de Juan José Caseiras Martínez en representación da Asociación Ría do Pedrido. Comezaremos a estudar esta proposta.
- Punto de encontro para mozos en Lubre, de Eduardo Fafián Montero. Retomarase a idea de sacar a concurso a concesión da cafetería da Senra.
- Pista lúdico-deportiva de Pump Track en Rois, de Raquel Landeira Vega en representación da Asociación Move-T. Estudarase a opción.
- Banco de material para eventos en Lubre, de Sonia Rilo Seoane en representación da ARCD Lubre. Prevista xa a compra de parte do material proposto.
- ‘Bergondo coa natureza’, de Soraya Sampedro Bores. Xa está previsto polo goberno municipal.
Entre as presentadas atópanse ideas que o goberno local considera interesantes pero que non se adaptaban a este proceso ou que se terán en conta para incluílas noutros paquetes de investimento ou en solicitudes de subvención a outras administracións.
“Gustaríanos que houbese máis propostas pero, aínda con todo, detectamos que as que se presentaron nesta ocasión se axustan máis á natureza do que buscamos cos Orzamentos Participativos”, explican desde o goberno local.
Aposta pola calidade
Un ano máis, o Concello de Bergondo volve contar cuns orzamentos participativos, que alcanzan xa a sexta edición, e fíxoo repetindo o formato iniciado o ano pasado, destinando un máximo de 100.000 euros para financiar a mellor das propostas recibidas.
Con este sistema o goberno local busca ampliar o abanico e que os veciños e veciñas de Bergondo teñan a posibilidade de presentar proxectos máis ambiciosos. “Vimos que é máis produtivo que se leve a cabo un só proceso, pero que teña relevancia, a escoller moitos pero pequenos”, explican desde o goberno local.
Os requisitos principais para a admisión de propostas, ademais de estar empadroado ou residir en Bergondo, eran: que fosen viables, que a súa execución dependese do Concello e non doutras administracións, e que tivesen un interese xeral ou parroquial.
